Snjallari bankaþjónusta hvar sem þú ert

Við bættum við ýmsum nýjungum í appið sem einfalda fólki lífið. Ein þeirra er að foreldrar og forsjáraðilar geta nú stofnað reikninga fyrir börn sín í appinu og fá sjálfkrafa skoðunaraðgang að bankareikningum barna sinna sem eru yngri en 18 ára.

Betri verðbréfaviðskipti í appinu og netbankanum

Viðskiptavinir geta nú á auðveldan hátt átt viðskipti á aðalmarkaði Nasdaq OMX Iceland og First North hlutabréfamarkaðnum í appinu og netbankanum. Þar er líka hægt að eiga viðskipti með alla sjóði Landsbréfa, þar með talið sjóði sem fjárfesta í erlendum verðbréfum. Einnig er hægt að stofna mánaðarlega áskrift að sjóðum Landsbréfa, fylgjast með eignasafninu, gera samanburðargreiningar og fá skýr yfirlit yfir verðbréfaeign og viðskiptasögu. Í appinu er líka hægt að skoða upplýsingar um inneign, réttindi og hreyfingar á lífeyrissparnaði hjá Íslenska lífeyrissjóðnum. Sem sagt – hægt er að nálgast upplýsingar um allar fjárfestingar og sparnað á einum stað.

Nánari upplýsingar er hægt að finna í kaflanum um eignastýringu og miðlun.

Notkun fyrirtækja á Landsbankaappinu jókst um 123% árið 2022. Appið er hlaðið möguleikum og aðgerðum sem auðvelda fyrirtækjum daglegan rekstur og sparar öllum sporin. 

Í appinu er auðvelt að skipta á milli fyrirtækja- og einstaklingsviðskipta, stofna bankareikninga, debetkort, kreditkort og innkaupakort, eiga viðskipti með hlutabréf og sjóði, auk fjölda annarra aðgerða og gagnlegra yfirlita. 

Fleiri viðskiptavinir stofna kröfur en áður

Útgefendum krafna fjölgaði um 9,2% milli ára. Aukningin er sprottin af nýjum viðskiptasamböndum en líka til marks um nýja uppbyggingu og viðreisn margra atvinnugreina í kjölfar heimsfaraldursins. Árið 2022 stofnuðu viðskiptavinir yfir 13 milljónir krafna í netbankanum eða appinu, sem er met.

Stofnun innheimtusamninga í sjálfsafgreiðslu jókst um 22 prósentustig milli ára og nemur nú 56,4%.  

Þriðjungi fleiri beingreiðslusamningar stofnaðir í sjálfsafgreiðslu

Frá árinu 2019 geta fyrirtæki stofnað beingreiðslusamning fyrir hönd greiðenda, svo greiðendur þurfi ekki að gera það sjálfir í sínum netbanka eða útibúi. Breytingin lækkar til muna umsýslukostnað viðskiptavina, auk þess að hækka þjónustustigið gagnvart þeim og þeirra viðskiptavinum. Þjónustan veitir Landsbankanum samkeppnisforskot og jókst sjálfsafgreiðslan um 31,3% á árinu. 

Greiðslur til útlanda aldrei fleiri

Greiðslum fyrirtækja til útlanda fjölgaði um 12,3% milli ára og voru 96,5% þeirra framkvæmdar í sjálfsafgreiðslu. Fjölgun greiðslna er í takt við tölur Hagstofunnar um aukinn innflutning fyrirtækja, auk þess sem greiðendum fjölgaði um 10,6% á árinu, meðal annars vegna nýrra viðskiptavina.

Í mars 2022 tóku gildi viðskiptaþvinganir á rússneska banka vegna stríðsins í Úkraínu. Þvinganirnar hafa óveruleg áhrif á greiðslur frá íslenskum fyrirtækjum þar sem umfang þeirra gagnvart viðkomandi bönkum er almennt lítið. 

Flest fyrirtæki stýra vöruúrvalinu

Í netbanka fyrirtækja geta viðskiptavinir keypt vörur og sótt ókeypis viðbætur fyrir bæði netbankann og appið. Núorðið nota flest fyrirtæki þessa leið til að fjölga netbankanotendum, bankareikningum og kortum, til að aðlaga bankaþjónustuna sem best að rekstrinum og til að fínstilla aðgangsréttindi starfsfólks í samræmi við starfssvið viðkomandi. 

Viðskiptavinir afgreiða sig sjálfir með flestar þessara aðgerða, eða í yfir 75% tilfella. Aukningin í fyrra er til marks um ánægju viðskiptavina með að fá að inna þessi verk af hendi á þeim tíma sólarhrings sem þeim sjálfum hentar. 

Aukning í sjálfsafgreiðslu

Vinsælustu innlánareikningarnir stofnaðir í sjálfsafgreiðslu í 82% tilfella

Fyrirtæki geta stofnað um 30 tegundir bankareikninga á eigin spýtur. Sé eingöngu litið til fimm vinsælustu reikningstegundanna þá eru 82% þeirra stofnaðir í sjálfsafgreiðslu. Það er rúmlega 4% vöxtur milli ára.

Flestir samningar undirritaðir rafrænt

Mikil breyting hefur orðið á kröfum viðskiptavina um fjármálaþjónustu. Þeir vilja nýta sjálfsafgreiðslu bankans á fleiri vegu og hafa greiðara aðgengi á sem flestan máta. Undirritun samninga er eitt skýrasta dæmið um þetta, en nærri 70% allra samninga viðskiptavina eru undirritaðir rafrænt.

Góður árangur í baráttu gegn fjársvikum á netinu

Viðskiptavinir eiga að geta sinnt öllum sínum bankaviðskiptum hvar og hvenær sem er. Til að það sé hægt rekur Landsbankinn fjölda öryggiskerfa og hefur auk þess á að skipa teymi netöryggissérfræðinga sem er í virku samstarfi við aðra sérfræðinga og banka víða um heim. Við höfum birt fjölda frétta og greina með aðvörunum og leiðbeiningum til fólks og fyrirtækja.

Við munum áfram efla fræðslustarfið og leggja okkar af mörkum til að stuðla að vitundarvakningu í samfélaginu. Við höldum líka áfram að hagnýta til hlítar sjálfvirka áhættugreiningu, fjársvikagreiningu, mynsturgreiningu, válista, viðurlagaskimun og ýmsar aðrar varnir gegn netsvikum og peningaþvætti.

Vel heppnuð útleiðing á stórtölvu RB

Stöðug fjárfesting í tæknilegum innviðum bankans birtist viðskiptavinum ekki alltaf með beinum hætti. Góðir innviðir auðvelda bankanum að bjóða upp á nýjungar í þjónustu, ásamt því að gera tækniumhverfið öruggara og stöðugra.

Eitt af stærri hugbúnaðarverkefnum undanfarinna ára var innleiðing á Sopra innlána- og greiðslukerfinu í samvinnu við Reiknistofu bankanna (RB) sem bankinn tók í notkun í lok árs 2017. Landsbankinn var fyrsti bankinn sem innleiddi kerfið. Þegar allir viðskiptavinir RB höfðu innleitt Sopra-kerfið, sem gerðist ekki fyrr en loks á árinu 2022, var mögulegt að ráðast í að einfalda enn frekar innviði RB í samvinnu og samstarfi við viðskiptavini félagsins, þ.m.t. Landsbankann.

Eldri kerfisuppbygging RB byggði á hagnýtingu stórtölvu en eftir að Sopra-kerfið var innleitt gerðu tækniinnviðir banka og sparisjóða það ekki lengur. Það kallaði á sértengingar við RB sem fólu í sér aukinn kostnað. Nýja Sopra-kerfið byggir ekki á stórtölvu sem þýðir að frá því Sopra fór fyrst í loftið þurfti að reka tvöfalt umhverfi í RB, annars vegar gamla kerfið með sértengingar við stórtölvuna og hins vegar nýja heiminn með tengingu við Sopra. Það var því mikilvægt þegar samkomulag náðist um að RB og þeirra viðskiptavinir ásamt samstarfsaðilum myndu stefna að útleiðingu stórtölvunnar árið 2022.

Verkefnið skiptist í nokkra hluta. RB þurfti að útleiða eða uppfæra þau kerfi sem keyrðu á stórtölvunni og viðskiptavinir RB þurftu að aðlaga sín kerfi og nýta nýja tækniinnviði RB. Fyrir Landsbankann voru stærstu verkefnin tengd flutningi útgáfu debetkorta og heimildagjöf þeirra, breytingum á hraðbankahugbúnaði og uppfærslu á kerfum bankans sem voru enn að nota eldri tækniinnviði RB og byrja nota nýja kynslóð tæknikerfa. Þar sem bankinn var að sækja gögn til RB með skráasamskiptum tók gagnatorg RB við og strengjasamskipti voru útleidd með hagnýtingu á þjónustutorgi. Þetta krafðist endurnýjunar á stórum hluta af bakenda innheimtukerfisins og breytinga á greiðslukerfum.

Þessu verkefni var að mestu lokið í lok árs 2022 en áætlað er að því ljúki endanlega á fyrsta ársfjórðungi 2023. Þegar því er lokið standa væntingar til að það skili hagræðingu í rekstri og þjónustu RB og nútímalegri tæknilausnum sem auðveldara er að reka og þróa áfram.

Einföldun tækniumhverfis

Samhliða stafrænni þróun og auknu framboði lausna í sjálfsafgreiðslu hefur Landsbankinn unnið að tiltekt og einföldun í eigin tækniumhverfi.

Bankinn hefur undanfarin ár lagt áherslu á að einfalda tækniumhverfi sitt með því að uppfæra kerfi og taka til í þeim lausnum þar sem notkun hefur minnkað eða breyst og möguleiki er á einföldun. Einnig er stöðug vinna við eðlilega endurnýjun á vélbúnaði og við að tryggja að sá vélbúnaður sem bankinn notar sé studdur af framleiðanda og uppfærður reglulega.

Gagnagrunnar bankans hafa verið einfaldaðir og unnið hefur verið að fækkun á þjónustuumhverfum og nútímavæðingu viðmóta þeirra lausna sem viðskiptavinir bankans nota, s.s. appsins og netbankans, en einnig þeirra kerfa sem starfsfólk notar við vinnu sína.

Þessi vinna gerir bankann sveigjanlegri og fljótari að bregðast við nýjum og breyttum þörfum ásamt því að auðvelda okkur að bjóða upp á nýjungar í þjónustu. Með því að nota nýjustu kerfin og nýjustu tæknina er sömuleiðis auðveldara fyrir bankann að sækja sér starfsfólk sem þekkir nútímalegt tækniumhverfi.