Helstu atriði ársreiknings

Eiginfjárhlutfall bankans í lok árs 2022 var 24,7% en var 26,6% í lok árs 2021. Eiginfjárkrafa bankans hækkaði úr 18,9% í 20,7% frá árslokum 2021 til 2022.

Í lok september 2022 birti skilavald Seðlabanka Íslands nýjustu ákvörðun sína um eiginfjárgrunn og hæfar skuldbindingar (MREL) fyrir Landsbankann. MREL-ákvörðun skilavaldsins felur í sér að bankinn þarf að uppfylla 22,8% MREL-kröfu, sem hlutfall af áhættugrunni bankans.

Kostnaður sem hlutfall af tekjum (K/T) á árinu 2022 var 46,8%, samanborið við 43,2% á árinu 2021.

Á árinu 2022 var vaxtamunur í hlutfalli af meðalstöðu heildareigna 2,7% samanborið við 2,3% árið á undan.

Hreinar vaxtatekjur námu 46,5 milljörðum króna samanborið við 39,0 milljarða króna 2021.

Hreinar þjónustutekjur Landsbankans námu 10,6 milljörðum króna árið 2022 samanborið við 9,5 milljarða króna á árinu 2021. Aðrar rekstrartekjur voru neikvæðar um 3,8 milljarða króna samanborið við rekstrartekjur upp á 13,9 milljarða króna á árinu 2021.

Rekstrarreikningur

Hagnaður Landsbankans á árinu 2022 nam 17,0 milljörðum króna eftir skatta.

Hreinar vaxtatekjur námu 46,5 milljörðum króna á árinu 2022 samanborið við 39,0 milljarða króna árið 2021. Vaxtamunur í hlutfalli af meðalstöðu heildareigna nam 2,7% en var 2,3% árið áður.

Hreinar þjónustutekjur námu 10,6 milljörðum króna á árinu 2022 samanborið við 9,5 milljarða króna á árinu 2021.

Hrein virðisrýrnun fjáreigna á árinu var 2,5 milljarðar króna samanborið við virðisrýrnun upp á 7,0 milljarða króna árið 2021. Á árinu 2022 dró verulega úr óvissu um endanleg áhrif heimsfaraldurs Covid-19 á lánasafn bankans og því er það mat bankans að ekki sé lengur þörf á sérstöku safnframlagi, hvorki í virðisrýrnunarsjóð vegna útlána til ferðaþjónustu né útlána til annarra fyrirtækja.

Aðrar rekstrartekjur voru neikvæðar um 6,3 milljarða króna á árinu 2022 samanborið við 6,9 milljarða króna árið 2021. Þar vegur þyngst lækkun á gangvirði óskráðra eignarhluta bankans í Eyri Invest hf. um 10,5 milljarða króna en á árinu 2021 var hækkun upp á 2,1 milljarð króna.

Rekstrargjöld voru 25,9 milljarðar króna á árinu 2022 samanborið við 25,9 milljarða króna á árinu 2021 og standa þau í stað frá fyrra ári. Aukin skilvirkni og fækkun stöðugilda undanfarin ár leiða til stöðugleika í rekstrarkostnaði. Kostnaður sem hlutfall af tekjum (K/T) fyrir árið reiknast 46,8%. K/T hlutfallið sýnir hlutfall rekstrarkostnaðar bankans á móti hreinum rekstrartekjum, að undanskildum virðisbreytingum fjáreigna. Stöðugildum í samstæðu bankans fækkaði um 3 á árinu 2022, úr 816 í 813.

Efnahagsreikningur

Heildareignir Landsbankans jukust um 57,2 milljarða króna á milli ára og námu í árslok 2022 alls 1.787 milljörðum króna.

Helstu breytingar á eignahlið Landsbankans á árinu 2022 voru að útlán til viðskiptavina jukust um 11,3%, eða um 156,9 milljarða króna. Aukning var í útlánum til fyrirtækja og jukust þau um 92,0 milljarða króna á árinu 2022, sem jafngildir um 10% vexti þegar tekið hefur verið tillit til gengisáhrifa. Íbúðalán jukust um 59,0 milljarða króna en það hægði á eftirspurn á 4. ársfjórðungi.

Heildarvanskil fyrirtækja og heimila þróuðust á jákvæðan hátt á árinu 2022. Vanskil eru í sögulegu lágmarki og í árslok 2022 var vanskilahlutfallið í 0,2%.

Sjóður og innstæður í Seðlabanka lækkuðu um 40,2 milljarða króna á milli ára og námu í árslok 2022 alls 42,2 milljörðum króna.

Markaðsskuldabréfaeign bankans lækkaði um 25,2 milljarða króna á árinu. Útlán og kröfur á lánastofnanir lækkuðu um 18,6 milljarða á árinu og voru í árslok 28,6 milljarðar.

Innlán frá viðskiptavinum eru stærsti hluti fjármögnunar bankans. Heildarinnlán námu 967,9 milljörðum króna í lok árs 2022 og jukust um 67,8 milljarða króna, eða 7,5% á milli ára. Innlánin eru að miklu leyti óverðtryggð og óbundin. Innlán frá fjármálafyrirtækjum lækkuðu lítillega á árinu, eða um 3,8 milljarða, og voru í árslok 6,6 milljarðar.

Markaðsfjármögnun bankans hefur einkum verið í formi alþjóðlegrar EMTN-skuldabréfaútgáfu og með útgáfu innlendra sértryggðra skuldabréfa. Bókfært virði þessarar fjármögnunar dróst saman um 9 milljarða króna á árinu 2022. Útgáfa sértryggðra skuldabréfa í heild hefur aukist í takt við vaxandi markaðshlutdeild í íbúðalánum og er orðin 44% af lántöku bankans.

Eigið fé Landsbankans í árslok 2022 var 279,1 milljarður króna samanborið við 282,6 milljarða króna í árslok 2021. Heildareignir námu 1.787 milljörðum króna í árslok 2022 og stækkaði efnahagsreikningurinn um 3,3%, eða um 57 milljarða króna á árinu.

Aðalfundur Landsbankans árið 2022, sem haldinn var þann 23. mars, samþykkti tillögu bankaráðs um að greiða arð til hluthafa vegna ársins 2021 sem næmi 0,61 krónu á hlut og að greiðslan verði tvískipt. Fyrri arðgreiðslan, 0,31 króna á hlut, var greidd til hluthafa þann 30. mars sl. og sú síðari, 0,30 krónur á hlut, var greidd þann 21. september sl. Arðgreiðslur þessar nema samtals 14,4 milljörðum króna. Einnig samþykkti aðalfundurinn tillögu bankaráðs um sérstaka arðgreiðslu að upphæð 0,26 krónur á hlut. Hún var greidd til hluthafa þann 28. apríl 2022 og nam í heild 6,1 milljarði króna.

Bankaráð Landsbankans mun leggja til við aðalfund þann 23. mars 2023 að greiddur verði arður til hluthafa sem nemur 0,36 krónum á hlut vegna rekstrarársins 2022, samtals 8,5 milljarðar króna. Arðgreiðslan samsvarar 50% af hagnaði samstæðu bankans á árinu 2022. Verði tillagan samþykkt munu arðgreiðslur Landsbankans á árunum 2013-2023 samtals nema 175,2 milljörðum króna.

Lausafjárstaða

Lausafjárstaða bankans í heild, í erlendum myntum og í einstökum myntum er vel umfram bæði lögbundin mörk og innri áhættumörk bankans. Hlutfall heildarlausafjárþekju var 134% í árslok, 99% í íslenskum krónum og 351% í erlendum myntum. Lausafjáreignir námu 185,8 milljörðum króna í lok árs 2022.

Meginmælikvarði lausafjáráhættu til skamms tíma er lausafjárþekjuhlutfall (e. liquidity coverage ratio (LCR)) sem mælir hlutfall hágæða lausafjáreigna af nettó heildarútflæði á næstu 30 dögum miðað við tilteknar álagsaðstæður.

Heildarlausafjárþekja var 134% í lok árs 2022 en Seðlabankinn gerir kröfu um að hlutfallið sé að lágmarki 100%. Lausafjárþekja erlendra mynta var á sama tíma 351% en Seðlabankinn gerir kröfu um að það hlutfall sé að lágmarki 100%. Lausafjárþekja í íslenskum krónum var 99% í lok árs 2022 en Seðlabankinn gerir kröfu um að hlutfallið sé 40%.